– Жалпы, таеквондоға қалай келдіңіз?

– Мектепте таеквондо үйірмесі ашылатыны туралы хабарландыруды көріп, қызығушылығым оянды. Содан бастап Ермекәлиев Еркебұлан ағайдың жаттығуларына қатысып, осы спортқа біржола бет бұрдым.

– Неліктен таеквондоны таңдадыңыз? Басқа да спортпен айналысып көрдіңіз бе?

– Басқа спортпен айналысып көрген жоқпын. Таеквондоны алғаш келгеннен-ақ қатты ұнатып, осы бағытта дамуды жөн көрдім.

– Алғашқы жаттығуыңыз бен турниріңіз сізге қандай әсер қалдырды?

– Алғашқы жаттығу өте қызықты өтті, сол сәттен бастап бұл спортқа деген ынтам арта түсті. Ал алғашқы жарысымда, әрине, өте қатты толқыдым.

– Әлемдік таеквондо жұлдыздарын қадағалайсыз ба? Кімнің стилі сізге жақын?

– Иә, әлемдік спортшыларды үнемі бақылап жүремін. Маған Таиландтың атақты спортшысы Панипак Вонгпаттанакит қатты ұнайды. Оның техникасы, тактикалық шеберлігі өте жоғары деңгейде.

– Осы спортта сізді алға қарай қадам басуға не жігерлендіреді?

– Мені алға жетелейтін - өзіме қойған мақсаттарым мен жеңіске деген ұмтылыс. Армандарым мені күн сайын жаттығуға жігерлендіреді.

– Жақында жастар арасында әлем чемпионы атануыңызбен құттықтаймыз. Бұл қандай сезім? Бұл жетістік сіз үшін нені білдіреді?

– Рақмет! Әлем чемпионы атану - ерекше сезім. Бұл - үлкен еңбектің нәтижесі әрі мен үшін жаңа деңгейдің бастауы.

– Жеңістен кейінгі алғашқы эмоцияңызды қалай сипаттайсыз?

– Ең алдымен, қуаныш пен мақтаныш сезімі болды. Еткен еңбегімнің ақталғанын сезіну ерекше әсер сыйлайды.

– Жақындарыңыз бен жанкүйерлердің қолдауы сезілді ме?

– Әрине, барша жанкүйердің қолдауы қатты сезілді.

– Ең қиын қарсыласыңыз кім болды? 

– Барлық қарсылас мықты болды. Әсіресе жартылай финал мен финал өте тартысты өтті.

– Финалда қандай тактиканы ұстандыңыз?

– Финалда бапкерімнің нұсқауын толық орындап, алдын ала дайындалған тактикамен жұмыс істедім. Соның арқасында жеңіске жеттім.

– Еске салсақ, бұған дейін жасөспірімдер арасында Азия ойындарының чемпионы атандыңыз. Әлем чемпионатымен салыстырғанда айырмашылығы қандай?

– Азия ойындарымен салыстырғанда, Әлем чемпионатында бәсеке әлдеқайда жоғары. Себебі бұл бәсекеге әлемнің түкпір-түкпірінен ең мықты спортшылар жиналады.

– Әлем чемпионатына дайындық қалай өтті? Күнделікті жаттығу процесіңіз туралы айтып берсеңіз, өзгерістер болды ма?

– Дайындық жоғары деңгейде өтті. Жеке бапкерім Ермекәлиев Еркебұлан ағаймен бірге тыңғылықты жаттықтық. Біз өзіміздің қалыптасқан техникамыз бен тактикамызды жетілдіруге басымдық бердік.

– Бапкерлеріңіздің рөлі қандай болды? Кімге ерекше алғыс айтқыңыз келеді?

– Жеке бапкерімнің еңбегі өте зор. Еркебұлан ағай маған әрдайым демеу болып, сенім беріп, дұрыс бағыт-бағдар көрсетіп отырды. Сол кісіге ерекше алғысымды білдіремін.

– Ендігі басты мақсатыңыз қандай?

– Ең үлкен мақсатым - Олимпиада чемпионы атану. Соған жету үшін бар күшімді саламын.

Қазақстан ҰОК баспасөз қызметі